Friday, December 7, 2012

සසර පුරා නුඹ මගේය..



 ගලන ගලන දොළ පාරක
මුදු සිහිලක්
දැනේය මට
දකින දකින සිතුවමකම
මුව පොඩිත්ත
හරි අගේට
අසන අසන කව් ගීයක
නුඹට උරුම
හඩ තිබේය
තබන තබන පියවරකම
සසර පුරා
නුඹ මගේය..

සිනිදු කසී සළුවක් මය



සිනිඳු 
කසී සළුවක්මය
සුවඳ 
නෙළුම් කැකුළක්මය
අඹුර පුරා
තරුවක්මය
මුළු දිවියට 
එළියක්මය
සැබැවින් මට  
එළියක්මය

Friday, June 22, 2012

පළමු හාද්ද වනාහි

සාහිත්‍යය යනු ජීවිතයේ සියුම් තැන් මෙන්ම ජීවිතයේ ගැඹුරුම තැන් ස්පර්ශ කරන්නට සමත් ප‍්‍රබලතම ගද්‍ය කාව්‍යයකි.

ඛළිල් ජිබ්රාන් නම් කතුවරයා විසින් ලියන ලද රචනයක පළමු හාද්ද සහ විවාහ බන්ධනය වනාහී යනුවෙන් මගේ සිත් ගත් සොඳුරුබර අදහසක් මා මෙසේ සටහන් කරමි.

පළමු හාද්ද වනාහි

එය, දෙවඟන විසින් ජීවිතයේ අමෘතය හා සමඟ මුව විට දක්වා පුරවා කුසලානේ ලා පානය කරන ලද පළමු බිඳුව වන්නේය. ආධ්‍යාත්මය රවටන්නා වූ සහ ආත්මය දුකෙහි හෙලන්නා වූ සංශයත්, සහෘදයා තුළ ආනන්දය ගලා යන නිශ්චිත භාවයත් යන දෙක බෙදා වෙන් කරන රේඛාවක් එය වන්නේය. එය ජීවන ගී පොතේ පළමු ගීය වන්නේය.

එය උත්කෘෂ්ට මිනිසාත් සමගිය අවසන් වන නාට්‍යයේ පළමුවන ජවනිකාවත් වන්නේය. එය අතීතයේ පැවති අන්ධකාරය සහ අනාගත මහා ආලෝකය අතරත් බන්ධනය වන්නේය. හැඟීම්වල නිහඩතාව සහ ඒවායේ ගීතය අතරැති බන්ධනය එය වන්නේය. එය හදවත සිංහාසනයක් බවට පත් කරන්නා වූ ද, පේ‍්‍රමය ඔටුනු පළඳවන්නා වූ ද, තොල් සතරකින් ගැයෙන සංගීතයක නාද මාලාව වන්නේය. එය රෝස මල් නම් දෙතොල් පෙති තුලින් සහනදායී දිගු හුස්මකුත්, මුදු කෙඳිරියකුත් නංවාලන්නා වූ මුදු අතැඟිලි නම් මඳ පවනින් ස්පර්ශ කිරීම වන්නේය.

පළමු හාද්ද වනාහී, ද්විමාන, ති‍්‍රමාන ආදී මානයන් සහිත ප‍්‍රකෘති ලෝකයෙන් ස්වප්න සහ ශැතිය සහිත ලෝකයක් කරා පෙම්වතුන් රැගෙන යන්නා වූ ආශ්චර්යවත් ස්පන්දනයෙහි ආරම්භය වන්නේය.
පළමු හාද්ද නම්, තම පරාග සම්මිශ‍්‍රණයෙන් තෙවන ආත්මයක් ජනිත වනු පිණිස සිදුවන සුගන්ධවත් දෙපුෂ්පයක සුසංගමය වන්නේය.

පළමු බැල්ම මිනිස් හදවත නම් වූ කෙතෙහි දෙවඟන විසින් වපුරන ලද ධාන්‍ය බීජය හා සමාන වන්නාක් මෙන් පළමු හාද්ද වනාහී ජීවිත වෘක්ෂයෙහි අතු අග පිපෙන පළමු කුසුම වන්නේය.

විවාහ බන්ධනය වනාහි

පේ‍්‍රමය, විවාහ බන්ධනයත් සමඟ ජීවිතයේ ගද්‍ය කාව්‍යය, නිශා කාලයේ රචිත සංගීත රචනාවන්ගෙන් යුතු දිවා කාලයේ ගයනු ලබන්නා වූ සුගායනීය තුති ගීතිකාවක් බවට පරිවර්තනය කරන්නේය. විවාහ බන්ධනයත් සමඟ පේ‍්‍රමයේ ප‍්‍රාර්ථනාව තම මූණ වසා ඇති ආවරණය ඉවත ලා හදවතෙහි ගැඹුරු තැන් කෙරෙහි ආලෝකය විහිදන්නේය. එය වෙනත් කිසිම සන්තුෂ්ටියකට තමන් ඉක්මවාලන්නට නොහැකි සන්තුෂ්ටියක් මවාලන්නේය. වඩා පැහැදිලිව කියතහොත් එය දෙවියන් විසින් ස්පර්ශිත ආත්මයක් වෙත ඇති සන්තුෂ්ටිය මවාලන්නේය.

විවාහ බන්ධනයක් වනාහී තෙවැන්නකු මෙලොව ජනිත වනු පිණිස සිදුවන දේවාත්මක ද්විත්වයක සුසංගමය වන්නේය. එය උත්කෘෂ්ට වූ පේ්‍්‍රමයක් පදනම් කරගෙන, ද්වෛතය අහෝසි කිරීමේ පරමාර්ථයෙන් ආත්ම දෙකක් සිදු කෙරෙන සංගමයක් වන්නේය. විවාහය යථෝක්ත උත්තරීතර සංගමය කරා මෙහෙයවන්නේ වෙනස් වූ පුද්ගලයන් දෙදෙනෙකුගෙන් උපන් දෙයාකාර වූ ආධ්‍යාත්ම ද්විත්වයක් මත පදනම් වෙමිනි. එය බැල්මකින් ඇරඹුණු සදාතනිකත්වය තුළින් අවසන් වන දම්වැලෙක රන් මුදුව වන්නේය. එය දිව්‍යමය ස්වභාව ධර්මයේ කෙත්වතු පොහොසත් කිරීමටත් ඊට ආශීර්වාද කිරීමත් පිණිස සුපිරිසිදු වූ නබෝ ගැබෙකින් ඇද හැලූණු සුපිරිසිදු වූ වර්ෂාවක් වන්නේය.

පෙම්වතා කෙරෙහි හෙළන පළමු බැල්ම මිනිස් හදවතේ වපුරන්නා වූ බීජ හා සමාන වන්නා සේ, තොල් පෙති මත තබන පළමු හාද්ද ජීවිත වෘක්ෂයෙහි අතු අග පිපෙන පළමු කුසුම වන්නා සේම, සුපෙම්වතුන් දෙදෙනෙකුගේ වෛවාහික සංගමය වනාහි මෙම වපුල බීජයේ පළමු කුසුමේ පළමු පළතුර වන්නේය.


Wednesday, March 28, 2012

ඔබට මතක නෑ මට මතකයි...


ඔබට මතක නෑ
මට මතකයි...
පසුගිය වසන්ත කාලේ..

ඔබට මතක නෑ
මට මතකයි...
පසුගිය වසන්ත කාලේ..

මා හද උයනේ
එකම මලයි පිපුණේ..
ඒ මල ඔබ දෙස බලා සිටිද්දී
සැලී සැලී ආශාවෙන්
නොසිතූ ලෙසින් ඔබ යන්න ගියේ..
පසුගිය වසන්ත කාලේ..

ඔබට මතක නෑ...
මට මතකයි...
පසුගිය වසන්ත කාලේ..

ගැයුම - විශාරද නන්දා මාලනී

අහම්බෙන් වගේ දැකපු පද කිහිපයක් නිසා මට මේ ගීතය අහන්න හිතුණා. නන්දා මාලනියන් විසින් ගයනු ලබන මෙම ගීතයට මගේ හිත පුදුම විදියට ඇදිලා ගියා. ගීතය පුරාවටම බොහෝ දුරක් මට ඇහුණෙ සුමියුරු සංගීතය පමණයි. පද කිහිපයක් පමණයි තියෙන්නෙත්. හරිම අපූරුයි. හරිම සංවේදී පද එකතුවක්. ඔබත් අහන්න. මා නිවැරදිද කියා ඔබත් අසා විඳ බලන්න.
ආදරයේ විරහව තැවරුණු ගීතයක සෝ සුසුම්වල ස්වරයන්ගේ වේදනාව ඔබටත් නිසැකවම දැනේවි.

Friday, January 13, 2012

ශ්වේත රාති‍්‍රය




මගේ ජීවිතයේ මම ලබපු සතුටුම අත්දැකීම. මගේ ජීවිතේ මම පුදුම විදියට සතුටු වුණ දවස. මම ලබපු රස අපමණයි. ඒ තමයි ශ්වේත රාති‍්‍රය....

නන්දා මාලනියන් ශ්වේත රාති‍්‍රයේ ගීත ගයනවා අහන්න දකින්න මම පෙරුම් පුරපු තරම්. ඒක හීනයක් වෙයි කියලයි මම හිතන් හිටියෙ. ඒත් මගේ ඒ හීනය සැබෑ කරගෙන දෙනෝ දාහක් සෙනඟ අතරින් එතුමියගේ ප‍්‍රසංගය නරඹන්න පොරකමින් ටිකට් පතක් මිලදී ගන්න මටත් වාසනාව ලැබුණා.
එතුමියගේ ගීතවලට මම පුදුම විදියට ආසයි. ශ්වේත වර්ණයෙන් බැබලූණ වේදිකාවට ශ්වේත වර්ණයෙන් සැරසුණ නන්දා මාලනිය නම් වූ ඒ සහෘද තරුව පායගෙන එනකොට මගේ හිතට දැනුණ සතුට වචන වලින් කිව නොහැකි තරම්. ඒ සතුට කියන්න බැරි තරම්. මගේ හිතට පුදුම මිහිරක් ගෙන දෙනවා. හිතට වෙහෙසක් දැනුණ වෙලාවට, දුකක් දැනුණ වෙලාවට මම ඇහුම් කන් දුන්නෙ නන්දා මාලනියන්ගේ ස්වරයට. ඇය මගේ හිත නිවන තරම්. මම බණ අහනවා. පොත් කියවනවා. හිත නිවා ගන්න කිසිවෙකුටත් බරක් නොවී ගුණ ධර්මවලින් පිරුණු යහපත් මනුස්සයෙක් විදියට සැහැල්ලූවෙන් ජීවත් වෙන්නයි මම කැමති.

‘‘කලා වැවෙන් ගත් දිය දෝතක් සේ අගී අගී ඔබ මටමැ අගී’’ කියන ගීතයෙන් වේදිකාවත් සහෘද රසික පිරිසත් අමන්නාදන්දයට පත් කරවමින් ප‍්‍රසංගය ආරම්භ කළ මේ මහාර්ඝ ශිල්පිනියගේ හඩ මගේ හිතට වගේම රැස්ව සිටි අධික ජන ගංගාවගේ සිත් සතන්වලටත් කියා නිම කළ නොහැකි තරම් ආශ්වාදයක් ගෙන ආ බවට නම් කිසිම සැකයක් නැති තරම්.
ඇත්තටම නන්දා මාලනියනි,


ඒකයි මගේ හිතේ ඇය වෙනුවෙන් ඇගේ ප‍්‍රසංගය ගැන මේ විදියට වචන ගොනු වෙන්නෙ. ඇගේ ස්වරය සංගීතයට මුසු වෙනවාත් සමඟම වේදිකාව ශ්වේත වර්ණය මුසු කරමින් ගෙන දුන් නන් විධ ආලෝකයෙන් පෙරළුණු පරිවර්තනයත් මගේ හිතට පුදුම විදියට දැනුණා.

ඒ සියල්ලම මුසු වුණු ඇගේ ස්වරය මගේ හිත දැහැන්ගත කළා. වේදිකාවෙන් නෙත් ඉවතට ගන්නට පවා අමතක වුණු සියලූ ශ‍්‍රාවක පිරිස පවා මම දැක්කෙ ඒ විදියට. සියල්ලන්ම නිහඩව නිසලව නෙත් යොමාගෙන සවන් යොමාගෙන බලා හිටියෙ ඇය ගී ගයන දිහාව. නන්දා මාලනියන් දිහාව. ඇය ගී ගයන අපූරුව. සජීවීව දාහක් සෙනඟ අතරෙ වාඩිගෙන ඇය ගී ගයන අපූරුව.

ජීවිතේ මා මෙතෙක් ගෙවූ සතුටුම පැය කිහිපය තමයි එදා ගෙවුණෙ. නන්දා මාලනියනි, ඇත්තටම ඔබට බොහෝ පිං.

ඇය ගී ගයන අපූරුව මම මීට කලින් දැකලා තිබුණෙ රූපවාහිනියෙන් පමණයි. පුංචි කාලෙ ඉඳන්ම මට ඇගේ ගීත අහන්න පුදුම විදියෙ ආසාවක් තිබුණා. මම ඇගේ ගීත ලියනවා. අහනවා, පාසලේ විවිධ ප‍්‍රසංගවලදි මම ඇගේ ගීත ගායනා කරලා තිියෙනවා. එදා ඉඳන්ම නන්දා මාලනියන්ගේ වැඩසටහනක් රූපවාහිනියෙ යනවා නම් මම අනිවාර්යයෙන්ම ඒක නරඹනවා. ඒ තරම්ම මම ඇයගේ ගීතවලට පි‍්‍රයයි. ශ්වේත රාති‍්‍රය නමින් ප‍්‍රසංගයක් රට පුරාම පවත්වන බව මම දැන ගත්තාම නුවරටත් එන දවස එනකල් මම ඇඟලි ගැන ගැන බලන් හිටියෙ.

‘‘තරුද නිදන මහ රෑ’’ ගීතය ගයනවාත් සමඟම නීල වර්ණයෙන් වේදිකාව වර්ණ ගැන්වුණ ආකාරය ඒ මතට ඇගේ හඩ පතිත වුණ අපූරුව.

තරුණ තරුණියන් බොහොමයක් දෙනා එදා ඇවිත් හිටියා. ඒ විතරක් නෙමෙයි. සීයලා ආච්චිලා පවා ඇයව අහන්න දකින්න ඇවිත් හිටියා. ඒ ඇවිත් හිටියෙ ඇයව දකින්න. ඇයව අහන්න. ඇගේ ගීත වල රසය විඳින්න මිසක් ඇගෙන් වෙන කිසිදු ලාභ ප‍්‍රයෝජනයක් ලබන්න නම් නෙමෙයි.

අවසානයේ මම ඇයට පිං දුන්නා. ගීතයක රසයක් විඳින්න ගීතයක් අහලා ඒ තුල දැහැන්ගත වෙන්න හිත සමාධිගත කර ගන්න මට ශක්තිය දීපු මගේ දෙමව්පියන්ටත් පිං. දෙනෝ දාහක් සෙනඟ අතරින් ඇය අසළට ගිහින් ඇගේ අතින් අල්ලන්න බොළඳ ආසාවක් මගේ හිතටත් ආවා. ඒත් ඒ මහා සෙනග කන්දරාව මැද්දෙන් ඈ අසළට කොහොම යන්නද කියලා මට හිතාගන්න බැරි වුණා. මම ඇගේ ගීතවලට පුදුම විදියට ආදරෙයි.

ඒ වගේම ඇගේ ගීතවලට පද අමුණන ඒ අග‍්‍රගණ්‍ය සුනිල් ආරියරත්නයන් හට පමණක් නෙමෙයි ඒ අපූර්ව වූ අපේත් මගේත් සිත් ඇද බැඳ ගන්න තරම් වූ තනු පබඳින රෝහණ වීරසිංහයන් හටත් බොහෝ කාලයක් අපේ සිත් සතන් තුළ තවත් ජීවමානව රැුඳෙන්නට වරම් ලැබෙන්න කියලා මම ප‍්‍රාර්ථනා කරනවා.

ප‍්‍රසංගය ක‍්‍රමයෙන් නිමාව කරා ළං වුණා. මට නම් කාලය ඉක්මනින්ම හොරු අරන් ගියා වගේ මහා ලොකු දුකක් දැනුණා. ශ්වේත වර්ණයෙන් හැඩවුණ වේදිකාව තුළිින් ‘‘ඔබයි රම්‍ය සඳ කිරණ’’ ගීතයේ තේමා සංගීතය වැයෙනකොට මගේ හිතට දැනුණ හැඟීම හරිම සුන්දරයි.
නන්දා මාලනිය ඒ ගීතය ගයන අපූරුව.

ආදරය, විරහව, දුක, සතුට, සැනසුම, වියෝව, විරහව, අභිමානය ආදී සියල්ලම කැටිවුණ ගීත පෙළක් ඇය ගායනා කළා. ඇත්තටම ඔබ තමයි අපේ සංගීත ලෝකයේ අපේ ගායන ලෝකයට පායපු රම්‍ය සඳ කිරණ.

ප‍්‍රසංගය නිමා වුණා. ඇය වේදිකාව අසළ හැමෝටම ආචාර කරන්න පටන් ගත්තා. පසුපසින් ‘‘ඔබයි රම්‍ය සඳ කිරණ’’ ගීතයේ සංගීතය වැයෙද්දි රැස්ව සිටි සියලූ දෙනාත් ඇයට ආචාර කරන්න ඇය වටා රොක් වෙන්න පටන් ගත්තා.

ප‍්‍රසංගය නරඹන්න ගියපු අපි නෙමෙයි එතනින් පිටවුණේ. අළුත් හැගීම්, අළුත් සතුටක් එක්ක අළුත්ම අළුත් අත්දැකීමක් ලබා ගත්තු අළුත් අපි තමයි එතනින් පිටවෙලා ආවෙ. ඇත්තටම අළුත්. නවමු අත්දැකීමක්.

නන්දා මාලනියනි, ඔබට දිගාසිරි... අපේ සවන් පිනෙව්වාට... අපේ හිත් සුවපත් කළාට...